काठमाडौं, असोज ८ । नेकपा एमालेको सचिवालय बैठकले केन्द्रीय कमिटीमा मनोनीत हुने सदस्य तथा स्थायी कमिटीमा रहने नेताहरूको नाम टुंगो लगाएको छ। बिहीबार च्यासलमा बसेको सचिवालय बैठकले अध्यक्ष केपी शर्मा ओलीको राजनीतिक प्रतिवेदनबारे पनि छलफल गर्दै त्यसले पार्टीभित्र एकताको भाव पैदा गरेको निष्कर्ष निकालेको हो।
बैठकपछि सञ्चारकर्मीसँग कुरा गर्दै एमाले उपमहासचिव लेखराज भट्टले अध्यक्ष ओलीको राजनीतिक प्रतिवेदनलाई पार्टीको तल्लो तहसम्म सम्प्रेषण गर्ने विषयमा छलफल भएको जानकारी दिए। उनका अनुसार प्रतिवेदनलाई एकरूपताका साथ बुझ्ने, अध्ययन गर्ने र त्यसपछि पार्टीका विभिन्न तहमा सम्प्रेषण गर्ने विषयलाई बैठकले प्राथमिकतामा राखेको थियो।
उपमहासचिव भट्टले अध्यक्षको प्रतिवेदनले पार्टीभित्र एकताको भाव पैदा गरेको बैठकको निष्कर्ष रहेको बताए। उनले प्रतिवेदनका विषयवस्तुलाई संगठनका तल्लो तहसम्म पुर्याएर त्यसबारे अध्ययन तथा छलफल गर्ने प्रक्रियालाई अघि बढाइने जानकारी दिए।
बैठकले केन्द्रीय कमिटीमा मनोनयन गर्ने सदस्यहरूको नामसमेत टुंग्याएको छ। यसैगरी स्थायी कमिटीमा रहने नेताहरूको नामका विषयमा पनि सचिवालयले निर्णय गरेको भट्टले बताए। यद्यपि मनोनीत हुने सदस्य र स्थायी कमिटीका नेताहरूको नाम तत्काल सार्वजनिक गरिएको छैन।
भट्टका अनुसार उक्त नामहरू केन्द्रीय कमिटीको बैठकमा प्रस्तुत भएपछि औपचारिक रूपमा सार्वजनिक हुनेछन्। यससँगै एमालेको आगामी केन्द्रीय कमिटी बैठकमा संगठनात्मक विषयसँगै नेतृत्व तहको संरचना र राजनीतिक प्रतिवेदनमाथि समेत छलफल हुने देखिएको छ।
सचिवालय बैठकले अध्यक्ष ओलीको राजनीतिक प्रतिवेदनलाई पार्टीका विभिन्न तहसम्म लैजाने निर्णय गरेसँगै त्यसको अध्ययन र कार्यान्वयन प्रक्रियासमेत अघि बढ्ने भएको छ। एमालेले संगठनभित्र प्रतिवेदनलाई समान रूपमा बुझाउने र त्यसका विषयमा तल्लो तहसम्म छलफल गराउने तयारी गरेको जनाएको छ।
प्रकाशित मिति: २०८३ आश्विन ८, बिहीबार १४:५२
